网易论坛

熊穎詩獨愛西人
2010.07.27



新一屆港姐即將誕生，去年奪得港姐季軍、5歲已移居加拿大的熊穎詩，今次遇上同屬在外國長大的華姐冠軍郭錦恩，同是選美出身兼同聲同氣的兩人一碰面，話題滔滔不絕。郭錦恩嫁外籍丈夫，熊穎詩也只曾跟西方人拍拖，她們論盡港男要面子的死症；當然少不了傳聞中選美的明爭暗鬥現象，及娛圈中最緊要「識做」的規矩。

撰文：霍淇
攝影：Tung Star
場地提供：HAIR@CWB

郭：5歲後有冇返過嚟香港？

熊：返嚟有，探嫲嫲同埋返嚟玩！

郭：你覺得你係一個加拿大人定係中國人？

熊：中國人，雖然我喺加拿大長大，但我仍然係中國人，屋企人就算喺加拿大亦都好傳統。

郭：飲食你注唔注重食中國菜？例如廣東人一定要飲湯咁！

熊：我都覺得係，雖然我平時都慣咗食西餐，就好似返到嚟就一定要去吓茶餐廳，食吓牛腩河、粥粉麵飯咁。點都要食吓！

郭：阿媽唔煮中菜？

熊：煮呀！日日都煮飯，日日都係食飯為主，所以如果長時間我冇飯食係會唔慣！

郭：中國節日呢？都會慶祝？

熊：媽咪都會，所以我都會跟住，好似新年同中秋都會慶祝。

郭：拍拖同中國人定係西（方）人？

熊：西人！

郭：長大環境影響你揀西人，抑或係咁啱遇到？有冇同過中國人拍拖？

熊：冇，但有中國人嘅男性朋友。我屋企人又唔係傳統到要限制拍拖類型，唔會話如果係咩人就唔准。

郭：但你帶個鬼仔返去佢哋唔會話「你做咩嘢呀」咁？

熊：唔……我諗都唔會，佢哋（家人）會畀耐性去了解，其實最終都係會睇個男仔對你好唔好！

郭：你覺得香港嘅男仔同加拿大嘅男仔有咩分別？

熊：香港男仔比較靜啲，唔主動，但外國男仔係會主動啲！

郭：邊方面主動？

熊：係會約你去街。

郭：係呀！香港男仔怕醜啲！

熊：可能係因為驚你會拒絕佢，要面。外國男仔可能你答佢今日我唔得閒，佢下次都會再約你。中國人就可能係第一次你話No呢，下次佢哋就唔敢喇。

行有行規

郭：呢個係咪你選完香港小姐後嘅經驗？

熊：都係?！

郭：佢哋會唔會因為你係港姐，所以有嗰種壓力會唔同？

熊：冇人同我講呢樣嘢，但我聽返嚟嘅反應係點都有些少。

郭：你覺得係咪因為你有港姐呢個Image，令到啲人好難去識你？

熊：我覺得可能有，但我冇特別去理咁多（港姐名銜），以前出街會Casual啲，着T恤牛仔褲，但?家就會注意呢啲嘢多啲，例如出街都會化個淡妝，但係同人相處、談吐呢方面我又唔會覺得有咩大改變。

郭：我記得我初初嚟香港呢，啲人話如果你入娛樂圈你要識玩個遊戲，我成日唔明佢講咩，一路都係唔明，你明唔明？

熊：Playthegame……

郭：即係要識做！

熊：識做？唔……我覺得無論你係咪喺呢個圈，每一行都會有自己嘅規矩。

郭：即係話呢個根本係現實世界，每一個行業都有？好似做公關咁，成日要去應酬，而呢個圈都好多應酬要做。

熊：係，呢個圈係特別多，你要睇吓自己適唔適合囉，如果話你本身唔鍾意去應酬，但係其實出去都冇嘢喎，去到都係同人傾偈、交流，如果同你傾偈呢個人係會畀意見你，咁對你自己都有好處。如果你覺得我唔鍾意做呢啲嘢……

郭：係咪會覺得佢根本就唔適合呢行？

熊：咁我又唔想抹殺一啲喺呢行有才華而又唔鍾意去應酬嘅人。

郭：你初初會唔會覺得好辛苦？因為外國生活係好Casual，冇咩所謂，但係呢度就無論生意人又好咩都好，都要去應酬吓，好麻煩？

熊：慣咗喇，因為我以前係做緊嘢，我喺間公司度都要見客，好多時都會接觸。

感情認真

郭：你嗰時選美係因為貪玩定係點？

熊：如果話冇發過明星夢就呃人。

郭：選嘅時候有冇見到好多唔好嘅嘢，你知道女人有時會因為妒忌心可以好毒！

熊：我哋選嗰10個女仔真係算係咁，以前睇到報道話會有批踭，但我哋嗰年就冇呢樣嘢，唔覺囉！我都覺得自己好彩，因為我選呢屆啲女仔大家都相處得好融洽，選完都有出嚟叙舊。

郭：冇嘢特別要小心？我成日諗到啲鹹濕佬，佢哋會趁影相嗰陣摶懵，有冇啲咁嘅經驗？

熊：有時人哋影相嗰陣自己會睇住，搭下膊頭都冇咩嘢，但攬腰嗰啲就唔得。

郭：你會覺得佢哋係想摶懵定係懶熱情？

熊：我又冇諗得咁複雜，只係感覺唔舒服唔想咁，其實都唔怕嘅，因為公司都有人睇住同保護。

郭：嚟緊會唔會留喺香港？

熊：會，都會留喺香港發展。

結婚生仔

郭：遲幾年呢？你想有咩將來？

熊：我想結婚生小朋友，但我唔會話我一定要5年內做到，我覺得順其自然，我個人對感情比較認真，所以我會花時間去認識一個人。

郭：香港難唔難搵？

熊：我覺得地方唔係咁重要，要嚟就要嚟。

郭：事業呢？最理想係點？

熊：最理想係你睇番自己做緊嘅嘢係好滿足，覺得自己開心、生活OK。

郭：冇話諗要搵幾多錢？

熊：我唔會定要搵幾多百萬先覺得先為之成功，有份自己鍾意嘅工做，生活過得OK我就已經覺得成功。

後記：魂遊太空

猶記得熊穎詩在參選港姐期間，無論面對記者訪問，又或是決賽當晚的問答環節上，當時廣東話仍不太流利的她，每當聽到問題時都表現出一副魂遊太空的「諗樣」。事隔一年，訪問當日熊穎詩亦承認以前對聽、講廣東話的反應很慢，不過眼見現時她聽與講都比從前流利，相信要說熊穎詩當選後的最大進步，非廣東話莫屬！

個人小檔案

郭錦恩（Crystal），1987年全美華埠小姐冠軍，曾擔任演員、電台及電視台主持、電影資料搜集及導演、編導舞台劇，以及從事兒童教育工作，多元化創作藝人，性格獨立敢言，為新時代女性象徵。