网易论坛

[忽然一週 第814期]娛一叮 爆發廿載宿怨 張智霖個唱請舊情人 靚靚：仔都生埋怕咩

 

 

合唱經典歌？許秋怡吖嘛！
本周一（ 2月 28日），袁詠儀被問到老公開個唱會否邀嘉賓合唱經典情歌，她即時扯高聲線回應。
唔介意翻舊帳！
當年有傳袁詠儀從許秋怡手中撬走張智霖，令兩女一直面左左。
依家好多嘢都未定嘅！
對於請許秋怡，張智霖未有正面回應，只表示一切都在商議中。

食住《魚躍在花見》的收視氣勢，「至贏師傅」張智霖於本月 26日起在紅館舉行一連兩場《我係外星人演唱會》亦已爆滿。四十歲人才首次踏足紅館舞台，當然不容有失。為了增加可觀性，張智霖除了積極練大隻之外，更不惜出動人情牌，請來各方好友撐場，其中有人提議邀請其初戀情人兼昔日好拍檔許秋怡任嘉賓。
雖然張智霖極之希望可以與許秋怡合唱多首經典情歌，但此舉就辣?了另一半袁詠儀。為防重提廿年前的「爭仔」恩怨，靚靚不單要求參與籌備個唱的會議，更加反對請許秋怡做嘉賓。本周一（ 2月 28日），靚靚聽到記者一提到許秋怡，頓時扯高聲線說：「我連仔都生埋，怕咩！」一於嚟個下馬威！

張智霖離開無綫五年後，回巢拍《魚躍在花見》，即使 39歲依然被讚「童顏防腐」。為了準備月尾的處男紅館個唱，早在 1月他已經開始狂操肌肉及戒食澱粉質和煎炸食物。為此他說：「依家日日都要跑步，做 gym，兩個月前已經冇食飯，搵咗個私人教練，由 160幾磅，到依家瘦咗廿磅，但我仲想減多少少。」
張智霖於本月 26日起開兩場演唱會，首次在紅館開騷的他，早前在記者會上興奮地衝口而出說：「其實內部訂購真係爆晒！」為了配合主題，他還戴上一雙外星人耳朵示人。

開會訂嘉賓名單

他多次與演唱會籌備小組開會，訂出演唱的歌曲和嘉賓名單。據知現時鐵定的嘉賓有張智霖的好友郭富城和草蜢，亦曾經聯絡過當年與 Chilam合唱〈現代愛情故事〉和〈片片楓葉情〉等經典情歌的初戀情人許秋怡，不過一直遭靚靚袁詠儀大力反對。「因為 Chilam自己嘅歌曲真係唔算多，最經典嗰兩、三首合唱情歌唔可以唔唱，搵其他合唱又唔係嗰個 feel，所以咪有人提議搵許秋怡，睇下佢肯唔肯囉。其實 Chilam都冇問題，但係靚靚就唔想俾外間將啲舊事攞嚟再講，話對演唱會冇幫助。不過唱片公司啲人就唔係咁睇，請許秋怡可以引起話題，況且 Chilam同靚靚啱啱慶祝完結婚十周年紀念，有乜好擔心吖！」知情者說。


00年張智霖在灣仔會展舉行小型音樂會，當時草蜢三子以嘉賓身份上台撐場。據知今年 Chilam首度在紅館開騷，草蜢亦會任嘉賓。《壹本便利》圖片


至於另一演唱會嘉賓就是 Chilam老死郭富城， 1月兩人與袁詠儀和沈嘉偉一同到紅館欣賞詹瑞文棟篤笑騷。《蘋果日報》圖片

 

元朗偶遇張智霖

就張智霖邀許秋怡做個唱嘉賓，記者致電許秋怡，她亦承認有人聯絡過她，「係有人同我講呢件事，都未決定，我仲度緊期，都唔知有冇時間，可能要去新加坡。」她對做 Chilam個唱嘉賓一事有保留，但就不介意被人翻舊帳。「都咁多年嘞，唔會介意俾人摷番以前啲嘢出嚟。大家都有個好好嘅家庭。點都好，祝佢演唱會成功。（有冇同 Chilam聯絡？）有一次我同書麒喺元朗食嘢， Chilam啱啱喺度拍劇，佢都有落車同我哋傾偈。」

至於反對張智霖再會舊情人的靚靚，記者周一（ 2月 28日）在活動上訪問過她，被問到演唱會籌備情況和所邀嘉賓，她想也不想就即時回答：「嘉賓請城城同草蜢吖嘛。」不過再問她老公唱經典歌，會否請來經典人時？靚靚略為停頓，突然提高把聲說：「你講邊個呀？係咪許秋怡呀？〈現代愛情故事〉吖嘛！請！咩唔請佢呀，唱經典歌梗係要請經典人啦！請許秋怡好吖！（介唔介意人哋講番以前嘅新聞？）唔介意，我哋婚都結咗，仔都生埋，仔都咁大個，怕咩！（咁 Chilam開會，你有冇俾意見？）我可以俾咩意見噃，我都唔識唱歌，佢哋傾咪得囉！」


初戀情人
廿年前，張智霖和許秋怡以情侶檔一起闖樂壇。男方更曾在電台《戀上你的牀》節目，披露自己初夜時不足廿歲，因而被指獻給其初夜的人是許秋怡。


張智霖和許秋怡的經典情歌如〈現代愛情故事〉、〈片片楓葉情〉等，推出時正值卡拉 OK熱潮興起，多首情歌均 hit爆，其唱片更賣過雙白金銷量。

靚靚被指第三者
被指第三者的靚靚， 94年 9月，正式承認與張智霖拍拖，翌年二人更在半山干德道同居。《壹週刊》圖片

 

三角宿怨

廿年前張智霖和許秋怡因合作而拍拖，彼此均是對方的初戀情人。不過三年後袁詠儀的出現，引發不少爭仔恩怨情仇，連張智霖都曾表示有愧於許秋怡。

合唱撻着

91年張智霖和許秋怡組情侶檔出碟，〈現代愛情故事〉唱到街知巷聞，更為兩人奪得多項新人獎，幕前情侶檔後來變成真戀人。

拍劇吼 Chilam

94年袁詠儀與張智霖合拍電影《邊城浪子》，即傳出袁介入並搶走張智霖。當年有指袁為了接近張，自掏腰包請張的好友劉小慧去日本旅行，買名牌手袋相贈，結果成功奪得美男歸，敗走的許秋怡則隻身到台灣發展。

為頸鏈動肝火

同年張智霖在《勁歌金曲》贏得一條頸鏈，事後許秋怡向外透露張把頸鏈轉贈給她，袁詠儀為此大動肝火。之後 Chilam向外表示頸鏈是送了給母親，但數日後他又改口說當晚場面混亂，只記得把頸鏈送人後便離去，不排除送了給許秋怡。

靚靚遭電話騷擾

96年許秋怡的新歌〈第三者〉及〈過份〉，被指是指桑罵槐鬧袁詠儀，袁在接受周刊訪問時說：「估唔到有人天使面孔魔鬼心腸」，她又稱張智霖在電話被人鬧衰格，彼此愈吵愈厲害。此外袁因受電話騷擾報警求助，許秋怡爸爸被帶警署助查。事後有指 Chilam向相熟記者透露，唯一覺得對唔住的女人是許秋怡。

是非糾纏不清


《壹週刊》圖片

 

其實又難怪靚靚心存芥蒂，廿年前，她被指做第三者，在許秋怡手上搶走張智霖。隨後數年兩女經常鬧不和， 96年 6月，許秋怡憑歌寄意，在台灣獻唱新歌〈第三者〉時，竟一度感觸落淚，惹來多方揣測，有影射靚靚之嫌。隨後靚靚向記者大吐苦水，認為有人博宣傳，許秋怡即擺明車馬說：「如果佢唔係第三者，又點解咁緊張喎。」之後靚靚還搞到報警求助，直指遭人多次電話騷擾，許秋怡與其父曾到警署助查。最後靚靚則表示不追究，她說：「算啦，都要俾條路人哋行！」彼此恩怨沒完沒了。直至許秋怡戀上王書麒，以及張智霖認定靚靚為終生伴侶後，是非才得以平息。

張智霖甚有女人緣，除了與黎姿傳過緋聞， 00年與佘詩曼拍《十月初五的月光》亦被指關係曖昧，至 09年袁詠儀與阿佘拍《 72家租客》，更一直面左左。

各有幸福家庭

許秋怡與張智霖這對廿年前的初戀情人，雖然曾經為感情事鬧到滿城風雨，但現在各有幸福家庭，張智霖與袁詠儀剛慶祝完結婚十周年紀念，乖仔「魔童」張慕童已近五歲。而許秋怡與王書麒結婚快八年，兒子王綽柵（ Cody）已七歲，二人一心培養他成才。


06年，靚靚為張智霖誕下兒子張慕童，她坦言希望生多個女，「除咗人工受孕，我乜方法都試過。」


張智霖與袁詠儀近年不停賺錢養家，月前還以夫妻檔拍攝鑽飾廣告，大晒恩愛。

張智霖經常把乖仔張慕童的親子照放上微博，讓朋友分享。




許秋怡與王書麒的兒子王綽柵（ Cody）讀九龍塘男拔萃二年班，許秋怡寧願少瞓幾個鐘，亦要親送兒子返學放學。近日他們更舉家由元朗搬到學校附近居住。


許秋怡與王書麒經常一家三口大玩親子樂，秋怡坦言她有幸嫁了個好老公。《蘋果日報》圖片


多年來王書麒經常與許秋怡上大陸賺人仔，經典歌〈現代愛情故事〉例必獻唱，秋怡還表示大陸版唱片更收錄了此歌，分別是男主角已由張智霖變成王書麒。他們連國內偏遠地區的騷都接，有指二人一年賺 400萬。

 

左右做人難

張智霖為了個唱叫好叫座，又怕老婆唔高興，認真左右做人難，至今仍未落實許秋怡會否在其個唱出現。上周六（ 26日），記者問 Chilam個唱嘉賓名單，他說：「其實依家都係城城同草蜢。（會唔會請許秋怡？）……仲傾緊。（係咪靚靚開會俾好多意見？）佢唔使開會啦，喺屋企都俾到意見我啦！」

撰文：娛樂組
攝影：攝影組

[忽然一週 第814期]娛一叮 拍拖個多月 黃婉曼戀金融才俊

 

我哋一見鍾情！（真實對白）
3月 2日春風滿面開工
本周三（ 2日），黃婉曼的新戀情登上報章娛樂版頭條。當日下午 6時許，春風滿面的她返 now準備主持《撳錢》。記者上前採訪，她亦停下來大方回應。

近日因主持 now寬頻電視派錢節目《撳錢》而再度爆紅的黃婉曼，上月剛自爆與拍拖兩年嘅無綫新聞部攝影師曾志釗分手，本周一（ 2月 28日）即被斷正與貌似林峯嘅四眼男睇戲。雖然事後黃婉曼承認戀情，但卻堅拒透露男友 F君背景及追求過程。
原來黃婉曼同 F君拍拖只有個多月，為免嚇走圈外男友，所以低調拍拖。本周三（ 2日），黃婉曼經本刊記者多番追問下，終透露男友從事金融業，兩人均是一見鍾情，更大讚男友：「佢斯文、踏實，一啲都唔蠱惑，希望係真命天子！」甜到漏！

 

本周一晚（ 2月 28日）黃婉曼與 F君去太古城 UA戲院睇恐怖西片《驅魔殿堂》，晚上 11時許散場，黃婉曼繑實男友步出戲院，一見人多即甩開手，非常避忌。黃婉曼發現報章記者後，即顯得不知所措，而貌似四眼林峯的 F君即驚到衝上剛停站的巴士，黃婉曼則獨自步行返回西灣河嘉亨灣香閨。其後黃婉曼雖在電話中承認戀情，但指對方是圈外人，不欲透露詳情。

自 2月初 now 101台開台後，黃婉曼因有份主持《撳錢》而忙個不停，人氣急升的她還要出席各大小商業活動，難得百忙中仍有空發展新戀情。本周三（ 2日）下午 6時許，黃婉曼返 now準備主持《撳錢》，本刊記者上前追訪她。她坦言對男友曝光毫無心理準備，「最近我日日係咁做，晚晚深夜 12點收工，嗰日難得出席完活動可以同佢食飯睇戲，估唔到撞到記者。 F君只係普通人，我哋開始咗只係個多月，雖然佢知我做呢行，但佢冇睇天氣報告同世界盃，所以唔知我有幾紅 o架！（佢唔知你係天氣女神？）女神？算吧啦！佢唔係圈中人，我尊重佢，唔想太高調，唔想嚇走佢呀！」

拍拖斷正
《蘋果日報》圖片


拖翻版林峯
本周一晚（ 2月 28日），黃婉曼與貌似林峯的四眼男友去太古城睇戲，被報章記者撞到正。本來繑實男友離開戲院的黃婉曼，突然甩開手仲四圍望，發現記者後無癮地與男友分開走。《蘋果日報》圖片


正版林峯


08年黃婉曼與無綫新聞部攝影師曾志釗拍拖，去年多次被影到與男友出雙入對，更被指共賦同居。可惜戀情維持了兩年便告吹。

同事暗笑
接受完本刊訪問後，黃婉曼步入會議室開會，工作人員和 C君（右一）未有即時恭賀她，但卻全程陰陰嘴笑，場面滑稽。


狂刨小小超新聞
工作人員準備了多份當日報紙供開會之用，黃婉曼冇揭自己做頭條嘅《蘋果日報》，一味狂刨李澤楷同 Isabella的分手新聞。

 

舊愛送上祝福

黃婉曼為了保護新戀情，起初堅拒透露 F君背景，不過經記者追問下終透露男友是專業人士。黃婉曼甜笑說：「 F君返朝九晚五，係金融界專業人士。我哋識咗大半年，最初都係通電話同 SMS聯絡，大家都係一見鍾情，經過深入了解後先一齊。（佢點?你？）拍拖初期佢都有甜言蜜語?吓我，亦有送過花。（你上月 25生日點同男友過？收咩禮物？）我自己過咋，仲未送呀，我係唔需要浪漫嘅人。我鍾意佢斯文踏實、人品好、唔蠱惑、唔囂張亦唔花弗！」

黃婉曼拍拖消息曝光，估唔到其攝影師舊愛曾志釗第一時間送上祝福。她說：「今朝新聞一出，我舊男友即時打嚟恭喜我話：『佢都幾靚仔吖！』（其實你同曾志釗幾時正式分手？）大慨係去年 10月，我哋係和平分手，到依家都係好朋友。（咩原因分手？）其實我係嗰種拍拖就想結婚嘅人，咁對方未必適合結婚，感情淡咗，就因了解而分開。」

最後黃婉曼表示希望 F君係真命天子，「我哋已經由觀察期變成穩定期，未見家長，希望佢係真命天子，不過講到結婚就言之尚早喇！」如果天氣女神閃電結婚，相信會令唔少宅男傷心。

facebook留言想低調

戀情被踢爆後，黃婉曼在 facebook內表明想把戀情低調，不少網友即時恭喜她，亦有網友表示明白她處境。


《撳錢》主持贈興


《蘋果日報》圖片

 

盧覓雪：後生女梗係要戀愛，愈多愈好?！佢話依家 27歲就搵到真命天子，真係傻。千祈唔好為呢個翻版 Chok樣林峯放棄呢個森林呀！


洪永城（左一）：哈哈！真係戥佢開心。（你呢個緋聞男友咪甩難囉！）大家都知傳聞唔係真。希望佢有男朋友後，做節目會更開心，派多啲錢。佢鍾意小朋友，就祝佢生多幾個 BB。

馬啟仁（右一）：我今朝都睇咗報紙，知道佢好大方承認拍拖。作為同事，佢開心我都戥佢開心。

撰文：娛樂組
攝影：攝影組

[忽然一週 第814期]媽咪姐手帳 陳茵媺食自己

 

買完嘢出嚟，見到媽咪姐，陳茵媺仲好 nice、笑容可掬咁同媽咪姐打招呼。

老人家有句說話：「人比人，比死人！」聽落又真係有道理。同是港姐冠軍嘅陳茵媺，同日咁啱出現喺利園地庫超市，同陳倩揚只係幾街之隔。工作量唔算多嘅佢，一臉濃妝艷抹，不過都無人認得出佢係港姐，媽咪姐見佢專揀食物，不過都係買一人份量，然後一抽二袋去畀錢。同係港姐出身，一個有老公養，賺錢買花戴；一個就要自食其力，一切靠自己。

跟住就掃無油無味嘅乾果同果仁（左圖）。之後到櫃枱畀錢，因為拎住大包細包，所以顯得有啲論盡。

陳茵媺入到超市，目標只係掃食得嘅嘢，佢第一步就去買沙律。

[忽然一週 第814期]留言集 但願我沒往昔 但願我沒記憶 蔡楓華

 

首先要撥亂反正，蔡楓華走下坡，與他說了「一剎那光輝不是永恒」無關。說這句話時為一九八五年，他之後推出大碟《絕對空虛》攀上事業高峰，是一九八六年。
令他下滑的，是因為唱片公司跟無綫打官司，他被限制出鏡，像如今的「四大」一樣。
「正如陳奕迅謝安琪，佢哋都無做錯事呀！」
當年沒有卡拉 OK，更沒有互聯網，不准歌手上鏡，等如叫佢去死。
「〈絕對空虛〉咁紅，居然一個獎都無，你話公平咩？」
曾經滄海難為水，因為風光過，所以特別戀棧。天皇巨星做不成，卻成了「癲王」，情何以堪？二十五年過去，令他忿忿不平瘋言瘋語的，是這既快樂又痛苦的記憶；讓他苟延殘喘支撐到今時今日的，正正也是這份舊記憶。
「蔡楓華能夠企番起身，真係一個奇蹟，希望大家俾條路行下。」
五十一歲人，大半生失了尊嚴。現在低聲下氣，也是為三餐一宿。演唱會在即，往昔既然不能抹去，惟有好好善用。

天皇巨


先別說言行舉止，蔡楓華給我的第一印象，高。應該有六呎，翻看舊照，的確比張國榮高半個頭。第二印象，瘦。他減了五十磅，我們借來三十一吋腰的褲，他全都合身；大家看到的相片，面形輪廓絕無後期修飾。
他禮貌地跟我握手，可能戴着黑超的關係，第三印象，冷，橫眉冷對千夫指的冷。他聲線很細，像生怕再次開罪傳媒。直至說到一九八六年，他就很火。應該說，無論我問甚麼，他都可以把話題說到八十年代去。
忽：對上一次演出已是○五年在國內登台，今次開演唱會，有沒有信心？
蔡：首先，當然會全力以赴，但希望大家不要期望太高，不要給我太大壓力。始終很多年沒有踏足舞台，是個很大挑戰。從來沒想過自己有開演唱會的一天，今次當試一試反應，下一站希望是紅館。

最近復出上《勁歌》仍然有大批 fans支持，蔡楓華直言好感動。

 

忽：紅館才是終極心願吧？
蔡：對，八六年有九個天皇巨（星），得我一個未在紅館開過個唱。
忽：甚麼九個天皇巨？
蔡：八六年有九個人角逐《勁歌》總選最受歡迎男歌星，分別是許冠傑、羅文、譚詠麟、張國榮、陳百強、我、呂方、張學友和林子祥。除了觀眾投票，歌星之間還可以互選，我、 Danny、 Alan和 Leslie是最後四強。但那晚總選我沒有出席，無綫有邀請，但我去了尖沙嘴 Canton Disco飲悶酒……
忽：其實你的低潮，是不關「一剎那光輝」事？
蔡：絕對無關！「一剎那光輝」發生在八五年，之後跟自己講，再出碟的話，一定唔衰得！八六年出《絕對空虛》，那才是人生的高峰。香港邊個唔識？遠至廣東省，甚至東南亞，個個都知道這首歌。一首咁勁嘅歌，居然總選拿不到獎，你說有無道理？當年某個天皇巨（指黎明）也是唱這首歌參加比賽……（下刪三分鐘）
事緣我唱片公司 CBS SONY隸屬 IFPI（國際唱片業協會），即是現在的「四大」，他們因版權問題跟無綫打官司，導致我不能出鏡。〈絕對空虛〉的金曲獎明明已拿到手，但要攞番出嚟……我跟公司嘈，最後他們只讓我角逐「最受歡迎男歌星」。我深深不忿，所以寧願一個人喝悶酒。
忽：〈絕對空虛〉沒有拿到獎，是你一生最大的遺憾吧？
蔡：是，我嬲公司為了打官司而犧牲我。我願意賠四十萬解約，你知八六年的四十萬有多少？可以在錦繡花園買四間獨立屋！但公司不願，寧願雪我三年，所以之後去了韓國拍《鬼馬朱唇》。
希望 TVB可憐我又好，補償我又好，有朝一日可以補頒一個獎給〈絕對空虛〉，那就無憾了。
忽：跟張國榮其實有沒有交惡？
蔡：從來沒有，我跟他不知幾 friend，交惡的是我們之間的 fans。八六年〈絕對空虛〉失了無綫和港台兩個大獎，到商台頒銷量大獎給我， Leslie第一個站起來拍掌。八八年譚詠麟宣佈不再拿獎了， Leslie還在我耳邊說：「佢唔攞我又唔攞，費事人哋覺得佢唔攞先輪到我！」我還跟他說：「有獎點解唔攞？」換着我，攞到七十歲都攞！

沒有劉嘉玲幸運

蔡楓華說自己當年跟陳百強、張國榮、譚詠麟四強鼎立，絕對是事實。他參加七九年「業餘歌唱大賽」獲冠軍入行，繼而成為當紅電台 DJ及兒童節目《香蕉船》主持。他是《勁歌金曲》第一代主持人，也是歷年來任期最長的一位。八一年他作的〈倩影〉大受歡迎，八六年〈絕對空虛〉更達白金銷量。
版權事件令蔡楓華事業走下坡，九十年代更出現一連串瘋言瘋語行為。他試過大鬧馬會及衝擊政府總部，更試過當街小便，傳媒因而冠他「癲王」之名。

人誰無過去？畢竟已事過境遷。至少，今天坐在我眼前的蔡楓華很正常，不過，也很忐忑。有些事明明想說，但又不敢說。


〈絕對空虛〉這個經典擘髀動作，相信為大家帶來不少歡樂。

當年的蔡楓華，是 SONY一哥。


跟哥哥，其實好 friend。


麗的電視劇《 IQ成熟時》，有莊靜而、已故鍾保羅、鄧藹霖和蔡楓華（右至左），當年很受歡迎，蔡楓華還唱主題曲。

 

蔡：今次再出來，傳媒都很錫我，朋友都叫我跟傳媒一笑泯恩仇。
忽：很嬲傳媒寫你做「癲王」？
蔡：我問你，假如你是蔡楓華，明明是一個正常人，但個個話你癲，你嬲唔嬲？這些年來名譽、地位、金錢全部失去，我的一生被毀滅了，誰來補償給我？
忽：但你有沒有想過為何傳媒都這樣寫你？你當年的確是做了很多令人以為你精神有問題的事。
蔡：如果一個黐線的人開演唱會還有這麼多人買飛入場，那買飛那班人豈不也是黐線？我沒有黐線，那些報道也不是傳媒炒作或惡作劇，我知道原因，但不能說。
忽：為甚麼？
蔡：現在想專心做演唱會，不想令人誤會我博宣傳。演唱會之後一定會一五一十交代這幾年到底發生甚麼事。
忽：○五年你右眼給人打傷，是不是得罪了有勢力人士？
蔡：我沒有做傷天害理的事，也沒有欠債。總之發生了很多事，已報警了，但沒有用。只可以說，我沒有劉嘉玲小姐好運。有人妒忌我，我受人打壓，但沒有人幫。
忽：為何不一早出來交代清楚？或許可以減輕大眾對你的誤解。
蔡：都說了容後再談，遲些，還打算出書……


「癲王」時代頂着個大肚腩，腰圍三十六。今天，腰圍三十一。

 

撰文：林蕾
攝影：袁家樂
協力：李梓軒
髮型及化妝： YY Chung
形象：吳寶玲、 Bryan@the Flaming
服裝： ZARA